Қазақстанда өсімдік шаруашылығын техникалық қамтамасыз ету бойынша 10 аймақ белгіленді
Қазақстанда өсімдік шаруашылығының дамуы тікелей ауылшаруашылық кәсіпорындарының техникалық қамтамасыз етілуіне байланысты. Бұл мәселенің өзектілігі азық-түлік тауарларына сұраныстың өсуімен және өндіріс тиімділігін арттыру қажеттілігімен түсіндіріледі. Механикаландыру мен заманауи технологияларды енгізу өнімділік пен өнім сапасын арттырудың негізгі факторы болып отыр.
Нұрлан Ибришев, э.ғ.д., профессордың айтуынша, «өсімдік шаруашылығын техникалық қамтамасыз етуді жаңарту еліміздегі ауылшаруашылық өнімдерінің көлемі мен сапасын арттыруда шешуші фактор болып табылады. Механикаландыру деңгейі артқанымен, ауылшаруашылық техникасының паркі толық жаңартылмаған, ал цифрлық технологиялардың енгізілуі әлі де төмен деңгейде».
2011–2023 жылдар аралығында елдегі тракторлар саны 2,6%-ға қысқарғанымен, олардың энергиямен қанықтылығы 19,8%-ға артты. Әсіресе әмбап-қатарлы тракторлардың үлесі 2011 жылы 66,1%-дан 2023 жылы 73,2%-ға жетті. Тракторлардың ең көп саны солтүстік астық аймақтарында шоғырланған; оңтүстікте – шамамен 2 есе аз, қалған өңірлерде 3–4 есе аз.
Тиімді жоспарлау үшін егістік алқаптарының құрылымы, өсірілетін дақылдар түрлері және шаруашылықтардың машиналық жүйелерінің сипаттамаларына негізделген техникалық аймақтарды құру әдістемесі енгізілді. Соның нәтижесінде Қазақстанда өсімдік шаруашылығын техникалық қамтамасыз ету бойынша 10 аймақ анықталды, олар өңірлік ерекшеліктерді және қажетті машиналар санын есептеуге мүмкіндік береді.
Зерттеу көрсеткендей, фермерлердің техника мәселесін шешу үшін тек машиналар паркінің жаңартылуы емес, қолдағы техниканы жөндеу, қосалқы бөлшектер жасау және заманауи ауыл шаруашылығы техникасын шығару бойынша бірлескен өндірістер құру мемлекеттік қолдаумен жүзеге асырылуы қажет.
Өсімдік шаруашылығын техникалық жаңғырту, инновациялық технологияларды енгізу және цифрландыру ауыл шаруашылығының тиімділігін арттырып, бәсекеге қабілетті өнім өндіруді қамтамасыз етеді және Қазақстанның аграрлық секторын нығайтады.
