Blog

Қазақстандық делегация GLAST-2026 форумына қатысты

by 10.11.2026

Қытайдың Санья қаласында өткен ауыл шаруашылығы ғылымы мен технологиялары саласындағы көшбасшылардың VIII жаһандық форумына (GLAST-2026) Басқарма төрағасы Есенбай Исламов бастаған Қазақ агроөнеркәсіптік кешен экономикасы және ауылдық аумақтарды дамыту ғылыми-зерттеу институтының өкілдері қатысты.

Форумды Қытай ауыл шаруашылығы ғылымдары академиясы (CAAS) GLAST ұйымдастыру комитетімен бірлесіп, БҰҰ-ның Азық-түлік және ауыл шаруашылығы ұйымы (FAO), Халықаралық ауыл шаруашылығы зерттеулері жөніндегі консультативтік топ (CGIAR) және Атом энергиясы жөніндегі халықаралық агенттіктің (IAEA) қатысуымен ұйымдастырды.

Форумның негізгі тақырыбы – «Ғылым мен инновациялар арқылы болашақтың ауыл шаруашылығын қалыптастыру». Институт өкілдері панельдік сессияларға, талқылаулар мен пікірталастарға қатысып, аграрлық зерттеулердің орнықты дамуы, азық-түлік қауіпсіздігін қамтамасыз ету, экология мен биоалуантүрлілікті сақтау мақсатында инновацияларды ілгерілету және өндіріске енгізу мәселелерін талқылады. Сондай-ақ халықаралық ұйымдар мен қорлардың, ғылыми-зерттеу институттары мен академиялардың тәжірибесі қарастырылды.

3 қарашада өткен арнайы кездесуде Панорталықазиялық ауыл шаруашылығы саласындағы ғылыми-технологиялық инновациялар альянсын құру бастамасы таныстырылды. Тараптар институттың Альянс жұмысына қатысу мүмкіндіктері мен алдағы ынтымақтастық бағыттарын талқылады.

Бұған дейін ынтымақтастық туралы меморандум жасалған Қытай ауыл шаруашылығы ғылымдары академиясы жанындағы Ауыл шаруашылығы экономикасы институтының директоры, профессор Xiangdong Hu-мен өзара байланысты одан әрі нығайту жөнінде уағдаластыққа қол жеткізілді.

CAAS вице-президенті, профессор Sun Tan-мен агроэкономикалық зерттеулер, агроөнеркәсіптік кешендегі ғылыми-зерттеу және тәжірибелік-конструкторлық жұмыстардың нәтижелерін өндіріске енгізу мен коммерцияландыру тәжірибесі бойынша ынтымақтастықты дамыту мәселелері талқыланды.

Сапар аясында делегация CAAS ғылыми-зерттеу институттарының тәжірибелік базаларында, агротехнопарктер мен ғылыми орталықтарда өткен көшпелі сессияларға қатысып, қолданбалы және іргелі аграрлық ғылымның түрлі бағыттарындағы жұмыстармен танысты.

Институт делегациясы Орталық Азия ауыл шаруашылығы саласындағы ғылыми-технологиялық инновациялар альянсын құру тұжырымдамасын талқылауға қатысты. Болашақта қатысушы елдердің географиясын кеңейтіп, Альянс қызметін ғылым, білім және өндіріс бағыттарында дамыту көзделіп отыр. Бұл бастама өңір елдерінің ғылыми-технологиялық әлеуетін біріктіріп, аграрлық саладағы халықаралық ынтымақтастықты жаңа деңгейге көтеруге мүмкіндік береді.

@agro__press @nasec

Еңбек еленіп, ерен еңбек ерекше құрметке бөленді

by 30.10.2026

«Ауыл» партиясының ұйымдастыруымен ауыл шаруашылығы саласының өкілдері, еңбек адамдары мен қоғам қайраткерлерін марапаттауға арналған салтанатты рәсім өтті.

Мерекелік іс-шара барысында Қазақстан Республикасы Президентінің Жарлығымен берілген мемлекеттік наградалар, сондай-ақ Қазақстан Республикасы Ауыл шаруашылығы министрлігінің ведомстволық марапаттары табысталды.

Мемлекеттік награда – «Ерен еңбегі үшін» медалімен марапатталғандардың қатарында ҚазАӨКЭжААДҒЗИ қызметкері Надежда Крымская да бар.

Бұл жоғары марапат – адал еңбек пен кәсіби біліктіліктің, өз ісіне деген жауапкершілік пен еліміздің әлеуметтік-экономикалық дамуына қосқан үлестің айқын көрінісі.

Салтанатты рәсімде сөз сөйлеген «Ауыл» партиясының төрағасы Қайрат Айтуғанов марапат иелерін құттықтап, әр азаматтың адал еңбегі ел дамуының маңызды негізі екенін атап өтті. Сондай-ақ ауыл шаруашылығы саласының дамуына үлес қосып жүрген еңбек адамдарының еңбегін бағалаудың маңыздылығына тоқталды.

Надежда Крымскаяны «Ерен еңбегі үшін» медалімен марапатталуымен ерекше құттықтай отырып, бұл марапат оның кәсіби қызметіне берілген жоғары баға әрі еңбегінің лайықты жемісі екенін атап өтеміз.

Барша марапат иелеріне зор денсаулық, отбасыларына амандық, бақ-береке, еңбектеріне толағай табыс, жаңа белестер мен биік жетістіктер тілейміз!

Еңбектеріңіз еленіп, абыройларыңыз асқақтай берсін! Ел игілігі жолындағы қызметтеріңіз жемісті болып, әрдайым құрмет пен қошеметке бөлене беріңіздер!

Құрметпен,
ҚазАӨКЭжААДҒЗИ Басқарма төрағасы Есенбай Исламов

Сичан университеті мен қазақстандық ғалымдар ынтымақтастықты кеңейтеді

by 30.10.2026

2026 жылғы 28 қазанда Қытай Халық Республикасының Сичан университетінің делегациясы Қазақстан Республикасы Ауыл шаруашылығы ғылымдары академиясы мен Қазақ агроөнеркәсіп кешені экономикасы және ауылдық аумақтарды дамыту ғылыми-зерттеу институтына келді.

Делегацияны Сичан университетінің ректоры, профессор Бай Цзе басқарды. Оның құрамында мал шаруашылығы факультеті деканының орынбасары, доцент Хуан Цзэньвэнь; мал шаруашылығы факультетінің оқытушысы, доцент Ху Чжицян; экономика, менеджмент және туризм факультетінің оқытушысы Чжан Чжэ; тіл, мәдениет және халықаралық коммуникациялар факультетінің оқытушысы, доцент Ага Эрцзин болды.

Сапардың мақсаты – өзара ынтымақтастықты тереңдету, ғылыми тәжірибе алмасу және агроөнеркәсіп кешені экономикасы, ветеринариялық медицина, қоғамдық ветеринариялық денсаулық сақтау мен биологиялық қауіпсіздік салаларында мамандарды бірлесіп даярлау мүмкіндіктерін қарастыру.

Кездесу барысында тараптар жануарлар ауруларының алдын алу және оларға қарсы күрес, вакциналар мен ветеринариялық биологиялық препараттарды әзірлеу, биологиялық қауіпсіздікті қамтамасыз ету, зертханалық диагностика, инспекциялау және сынақ жүргізу, сондай-ақ агроөнеркәсіп кешені экономикасын зерттеу бағыттарындағы ықпалдастықты талқылады.

Бірлескен ғылыми жобаларды жүзеге асыруға, ортақ зерттеу алаңдарын құруға, ғалымдар мен мамандар алмасуға, магистранттар мен докторанттарды бірлесіп даярлауға ерекше назар аударылды.

Кездесуге қатысушылар «Бір белдеу – бір жол» бастамасына қатысушы елдердің аграрлық ғылымын, ветеринариясы мен мал шаруашылығын дамытуға бағытталған ұзақ мерзімді әріптестікті нығайтуға мүдделі екендерін білдірді.

@agro__press @nasec

Молдашев: Цифрландыру мен ғылым аграрлық саланы жаңа деңгейге көтереді

by 30.10.2026

ҚазАӨК экономикасы және ауылдық аумақтарды дамыту ғылыми-зерттеу институтының бас ғылыми қызметкері, экономика ғылымдарының докторы, профессор А.Б. Молдашев Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Жолдауында айтылған агроөнеркәсіп кешені мен аграрлық ғылымды дамыту бағыттарына қатысты пікір білдірді.

Ғалымның айтуынша, ұзақ мерзімді инвестициялар, 1,5 трлн теңгеге дейінгі жеңілдетілген несиелеу, тамақ өнеркәсібін дамыту, отандық ауыл шаруашылығы техникасын өндіру және жасанды интеллектіні аграрлық секторға енгізу саланың өркендеуіне жаңа серпін береді.

Аграрлық ғылымның негізгі міндеттері қатарында селекция мен генетиканы дамыту, дәлме-дәл егіншілік пен цифрлық технологияларды енгізу, органикалық ауыл шаруашылығын өркендету, өнімді терең өңдеу және білікті мамандар даярлау бар.

Профессордың пікірінше, ғылым мен қаржыландыруға негізделген цифрлық трансформация еліміздің азық-түлік қауіпсіздігін нығайтып, Қазақстанның аграрлық өнім экспортындағы орнын күшейтеді.

ҚазАӨКЭжААДҒЗИ ұжымы президент Жолдауын тыңдады

by 28.10.2026

Бүгін ҚазАӨКЭжААДҒЗИ ұжымы Қазақстан Республикасының Президенті Қасым-Жомарт Тоқаевтың Қазақстан халқына арнаған Жолдауын тыңдады.

Іс-шара барысында қызметкерлер Мемлекет басшысының ел дамуының негізгі бағыттары, алдағы міндеттер мен стратегиялық басымдықтар жөніндегі ойларымен танысты.

Президент Жолдауы – еліміздің әлеуметтік-экономикалық дамуының маңызды бағдарларының бірі. Онда айқындалған міндеттер алдағы жұмыстың басым бағыттарын белгілеуге және жаңа мақсаттарға қол жеткізуге негіз болады.

ҚазАӨКЭжААДҒЗИ ұжымы агроөнеркәсіптік кешенді дамытуға, ғылыми әлеуетті арттыруға және еліміздің өркендеуіне өз үлесін қосуды жалғастырады.

@agro__press @nasec

Азық-түлік қауіпсіздігі мен өндірістің инновациялық дамуы талқыланды

by 23.10.2026

2026 жылғы 22 қазанда Алматы технологиялық университетінде «Тамақ, жеңіл өнеркәсіп және қонақжайлылық индустриясының инновациялық дамуы» атты халықаралық ғылыми-практикалық конференция өтті.

Конференцияны университеттің бірінші проректоры, техника ғылымдарының докторы, профессор Бауыржан Нұрахметов ашты. Іс-шараға Қазақстан, Қырғызстан және Түркияның ғалымдары мен сарапшылары қатысты.

Пленарлық отырыста Қазақ агроөнеркәсіп кешенінің экономикасы және ауылдық аумақтарды дамыту ғылыми-зерттеу институты Басқарма төрағасының орынбасары, экономика ғылымдарының докторы, профессор Ғалия Әкімбекова «Қазақстан Республикасының азық-түлік қауіпсіздігі: АӨК өнімдерінің негізгі түрлерімен қамтамасыз етілуін бағалау» тақырыбында баяндама жасады.

Қатысушылар тамақ және жеңіл өнеркәсіптің өзекті мәселелерін, өндірісті инновациялық дамыту жөніндегі шетелдік тәжірибені, азық-түлік қауіпсіздігін және қонақжайлылық индустриясында жасанды интеллектіні қолдану мүмкіндіктерін талқылады.
Конференция қорытындысында салаларды инновациялық дамытуға бағытталған ұсыныстар әзірленіп, жұмыс секциялық отырыстарда жалғасты.

@agro__press @nasec

Subscribe to our newsletter

Lorem ipsum dolor sit amet, consectetur adipiscing elit. Proin porttitor nisl nec ex consectetur, quis ornare sem molestie.