«Бақ күні – 2026»: ғылым аграрларды біріктірді
11 қыркүйекте Алматы облысының Қаракемер ауылында «Жасыл бағыт: ғылымды, кәсіптік білім мен аграрлық өндірісті ықпалдастыру» тақырыбындағы «Бақ күні – 2026» іс-шарасы өтті. Ауқымды басқосу ғалымдарды, оқытушыларды, сала мамандары мен ауыл шаруашылығы тауарын өндірушілерді бір алаңға жинады.
Іс-шараға Қазақ агроөнеркәсіптік кешен экономикасы және ауылдық аумақтарды дамыту ғылыми-зерттеу институтының өкілдері де қатысты. Олар аграрлық сала мамандарымен бірге ғылыми жетістіктерді өндіріске енгізу, білікті кадрлар даярлау және ғылым, білім мен бизнес арасындағы ынтымақтастықты нығайту мәселелерін талқылады.
KazNARU ғалымдары өздерінің перспективалы әзірлемелері мен зерттеу нәтижелерін таныстырды. Отандық селекция жетістіктеріне, жеміс-жидек және көкөніс дақылдарының жаңа сорттарына, сондай-ақ өнімділік пен ауыл шаруашылығы өнімдерінің сапасын арттыруға мүмкіндік беретін заманауи өсіру технологияларына ерекше назар аударылды.
Қатысушылар тәжірибе алмасып, аграршылардың өзекті қажеттіліктерін саралады. Сонымен қатар ғылыми жаңалықтарды шаруашылықтарда тиімді қолдану және инновациялық тәсілдерді өндіріске жедел енгізу жолдары талқыланды.
«Бақ күні – 2026» ғылым, кәсіптік білім және өндіріс арасындағы тығыз байланыстың аграрлық саланы технологиялық жаңғыртуға берік негіз қалайтынын көрсетті. Мұндай ашық диалог инновациялардың өндіріске жетуін жеделдетіп, шаруашылықтардың тиімділігін арттыруға және Қазақстан ауыл шаруашылығының орнықты дамуына жаңа мүмкіндіктер ашуға ықпал етеді.
@agro__press @nasec
