Blog

ҚазАӨК экономикасы және ААДҒЗИ мамандары Алматы облысындағы ет өңдеу кәсіпорнына қаржылық-экономикалық консалтингтік қолдау көрсетті

2026 жылғы 21 шілдеде ҚазАӨК экономикасы және ААДҒЗИ қызметкерлері Алматы облысының Жамбыл ауданына жұмыс сапарымен барып, «Empire Food Meat Production Facility» ЖШС-не қаржылық-экономикалық консалтингтік қолдау көрсетті.

Жұмыс барысында мамандар кәсіпорынның өндірістік жағдайымен танысып, өндірістік қуаттарды тиімді пайдалану және оларды толық жүктеу мәселелерін талқылады. 2019 жылы іске қосылған ет комбинаты бір ауысымда 120 бас ірі қара және 1000 басқа дейін ұсақ малды союға қауқарлы.

Кездесу аясында ет комбинатының ауыл шаруашылығы тауарын өндірушілермен, салалық қауымдастықтармен және жергілікті атқарушы органдармен кластерлік тәсіл негізінде өзара іс-қимылын дамыту, сондай-ақ мал шаруашылығындағы кооперацияны жетілдіру мәселелері қарастырылды.

Тараптар өңірдің экспорттық әлеуетін арттыру, етті терең өңдеуді дамыту және ғылым мен өндіріс арасындағы ынтымақтастықты күшейту бағытында бірлесіп жұмыс істеуге келісті. Бұл бастамалар 2026–2030 жылдарға арналған Мал шаруашылығын дамытудың кешенді бағдарламасын іске асыруға және Алматы өңірінде жоғары технологиялы мал шаруашылығын дамытуға ықпал етеді.

Консорциумның көшпелі кеңесі: Көкөніс шаруашылығы орталығын құру бағытындағы нақты қадамдар

2026 жылғы 16–17 шілдеде Консорциум құрамындағы Қазақ жеміс-көкөніс шаруашылығы ғылыми-зерттеу институты (ҚазЖКШ ҒЗИ), Қазақ агроөнеркәсіптік кешен экономикасы және ауылдық аумақтарды дамыту ғылыми-зерттеу институты (ҚазАӨК экономикасы және ААД ҒЗИ) және ҚазЖКШ ҒЗИ-дың Сарыағаш филиалы өкілдері «Красноводопад ауыл шаруашылығы тәжірибе станциясы» ЖШС базасында көшпелі жұмыс кеңесін өткізді.

Кеңес барысында Консорциумдық келісімнің негізгі мәселелері, Бас инвестициялық жоба (ГИП) және Жол картасының орындалу барысы талқыланды. Қатысушылар селекциялық жылыжай салынатын аумақты аралап, әлеуетті жабдықтаушы компаниямен онлайн форматта жылыжай мен инфрақұрылым нысандарының орналасуын келісті.

Сонымен қатар жобаның қаржылық-экономикалық негіздемесіне қажетті деректер нақтыланып, өндірістік жоспар пысықталды. Суармалы егістік алқаптары, көкөніс дақылдарын орналастыру және логистикалық шешімдер қарастырылды. Делегация тұқым шаруашылығына арналған дәнді дақылдарды жинау жұмыстарының барысымен танысып, тәжірибе станциясының ұжымымен көкөніс тұқым шаруашылығын дамыту, жас мамандарды тарту және жылыжай технологияларын дамыту мәселелерін талқылады.

Кездесу қорытындысында Консорциум мүшелері Көкөніс шаруашылығы орталығын құру жобасын бірлесіп іске асыруға дайын екендіктерін растап, Жол картасында белгіленген міндеттерді орындау үшін өзара ынтымақтастықты одан әрі күшейту қажеттігін атап өтті.

@agro__press @nasec

Алматыда аграрлық ғылымның болашағы мен ауылды дамыту мәселелері талқыланды

Алматы қаласында аграрлық ғылымды дамытуға арналған «Қалиев оқулары–1» халықаралық ғылыми-практикалық конференциясы өтті

Бүгін Алматы қаласында «Аграрлық ғылымды және Қазақстанның агроөнеркәсіптік кешенін ғылыми тұрғыдан қолдауды дамыту: теория, әдіснама және тәжірибе» атты «Қалиев оқулары–1» халықаралық ғылыми-практикалық конференциясы өтті.

Конференция Қазақстан Республикасының «Ұлттық аграрлық ғылым академиясы» Президиумының, Қазақ агроөнеркәсіптік кешенінің экономикасы және ауылдық аумақтарды дамыту ғылыми-зерттеу институтының және «Қазақстан Республикасының «Ұлттық аграрлық ғылыми-білім беру орталығы» КеАҚ» ұйымдарының жетекші ғалымдарының бастамасымен ұйымдастырылды. Іс-шараға Қазақстан Республикасы Парламентінің, Ауыл шаруашылығы министрлігінің, Ғылым және жоғары білім министрлігінің өкілдері, сондай-ақ Ресей, Беларусь, Моңғолия, Өзбекстан, Қырғызстан және Тәжікстан елдерінің жетекші ғалымдары қатысты.

Конференция қатысушылары баяндамаларды тыңдап, агроөнеркәсіптік кешенді ғылыми қамтамасыз ету мәселелерін талқылай отырып, төмендегілерді атап өтті:

Қазақстанның аграрлық секторы экономикадағы негізгі салалардың бірі болып табылады. Елдің табиғи-экономикалық жағдайы оны астық және мал шаруашылығы бағытындағы, сондай-ақ өсімдік шаруашылығы мен қайта өңдеу салалары дамыған аграрлық жүйе ретінде қалыптастырады. Қазақстан 215 млн гектар ауыл шаруашылығы жер ресурстарына ие.

Өндіріс көлемінің тұрақты өсуі халықтың азық-түлікпен қамтамасыз етілуін жақсартуға ықпал етуде. Сонымен қатар бірқатар азық-түлік тауарлары бойынша импортқа тәуелділік сақталуда, бұл отандық өндіріс пен қайта өңдеу саласын дамыту қажеттілігін көрсетеді.

Азық-түлік қауіпсіздігі, инфляциялық қысым, ауыл шаруашылығы кооперациясын дамыту, цифрландыру, жасанды интеллект енгізу, су ресурстары тапшылығы және табиғи ресурстарды ұтымды пайдалану мәселелеріне ерекше назар аударылды.

Қатысушылар аграрлық ғылымды дамытудың басым бағыты ретінде ғылым, білім және өндіріс интеграциясын күшейту, халықаралық ынтымақтастықты кеңейту және жаңа буын мамандарын даярлау қажеттігін атап өтті.

Конференция агроөнеркәсіптік кешенді инновациялық және цифрлық даму моделіне көшірудің стратегиялық маңызын айқындады.

@agro__press @nasec

Қазақстанның агроөнеркәсіптік кешенін дамыту мәселелері бойынша Алматыда дөңгелек үстел өтті

Алматыда Қытай мен Қазақстан ғалымдары аграрлық экономиканы дамыту мәселелерін талқылады