Климаттық тәуекелдер мен осалдықты бағалауға кіріспе (CRVA)

2023 жылғы 15 наурызда «Климаттық тәуекелдер мен осалдықты бағалауға кіріспе (CRVA)» тақырыбында семинар өткізілді. Семинарды сала сарапшысы, Агроконсалтинг орталығының жетекшісі Қасым Р.Т. жүргізді.

Семинар барысында климаттың өзгеруінің негіздері мен жаһандық сын-қатерлер қарастырылып, сондай-ақ CRVA әдіснамасы таныстырылды. Климаттық қауіптерді, осалдық пен экспозицияны анықтау мәселелеріне, сондай-ақ жоғары оқу орындарының климаттық тәуекелдерді бағалаудағы рөліне ерекше назар аударылды.

Қатысушылар ғылыми және қолданбалы қызметте климаттық тәуекелдерді талдау тәсілдері бойынша базалық білім мен түсінік алды.

Семинарға Қазақ ұлттық аграрлық зерттеу университетінің (ҚазҰАЗУ), М. Тынышпаев атындағы АЛТ университетінің студенттері, магистранттары мен докторанттары, сондай-ақ АӨК экономикасы және ауылдық аумақтарды дамыту жөніндегі Қазақ ғылыми-зерттеу институтының қызметкерлері мен ғалымдары қатысты. Сонымен қатар онлайн форматта С. Сейфуллин атындағы университеттің студенттері қатысты.

Семинар халыққа білім беру және ғылым саласындағы негізгі бағыттарды түсіндіру мақсатында, сондай-ақ Біріккен Ұлттар Ұйымының Тұрақты даму мақсаттарын қолдау аясында өткізілді:

ТДМ 13 — «Климаттың өзгеруімен күрес: климаттық өзгерістерге қарсы шұғыл шаралар қабылдау»;

ТДМ 4 — «Сапалы білім: инклюзивті және сапалы білім беруді қамтамасыз ету».